Teksa njihet mënyra e transportit më gomone, që është në fakt shumë e rrezikshme për jetët e emigrantëve që ndodhen në bord, duket se ekziston e një formë tjetër për të shkuar ilegalisht në Britaninë e Madhe, e përdorur dhe nga shqiptarët.
Gjithçka sqarohet nga një ish-ushtar britanik për BBC, i cili shërbeu për disa kohë si një trafikues emigrantësh. Ai u dënua me burg në vitin 2019, por “inati” i tij ndaj autoriteteve, situatës së cilës ai ndodhet, por dhe faktit që kjo veprimtari transporti vijon ende e pse atij i është hequr liria, ka bërë që të flasë.
Identiteti i ish-ushtarit nuk bëhet i ditur, por ai sqaron se si bëhej transporti i shqiptarëve. Fillimisht shqiptarët kalonin nga makinat drejt trageteve apo jahtëve. Më pas, futeshin nën kuvertat e kamioneve, për të kaluar në Kanalin Anglez.
Muajin e kaluar, sipas ish-ushtarit, u kap një jaht luksoz që fshihte 20 shqiptarë në bord. Ky jaht u kap gjatë rrugës për në Neëquay në Cornëall.
Historia e këtij trafikuesi emigrantësh nis në vitin 2009, kohë kur një mik i tij shqiptar e punësoi atë. Sipas shqiptarit, ish-ushtari do të shmangte dyshimet nga autoritetet kufitare, për shkak të lëkurës së zbehtë dhe pasaportës britanike.
Për çdo emigrant që kalonte, ai paguhej me 3500 paund. Në fillim i fshihte emigrantët e paligjshëm pranë porteve franceze, në bagazhin e makinës së tij. Përgjatë udhëtimit në traget ose jaht, ish-ushtari, pasi të mbërrinin në tokën e thatë, do i hipte emigrantët në një kamion. Çdo emigranti i jepej një thikë xhepi, e bëhej një prerje në njërën anë si formë “V”, por nuk shpjegohet se ku bëhet kjo prerja.
Shumica e atyre që transportoheshin nga ky person, nuk dëshironin të kërkonin azil në Mbretërinë e Bashkuar, por të “zhdukeshin” drejt punës së zezë, apo dhe me pjesëmarrjen në aktivitetet e lëndëve narkotike.
Kujtojmë se një nga sfidat kryesore të Britanisë së Madhe është luftimi i emigracionit të paligjshëm. Kryeministri anglez, Keir Starmer, ka shprehur më herët ambicien e tij për krijimin e qendrave për pritjen e azilkërkuesve, marrëveshje pra të ngjashme me atë të Shqipëri-Itali, të cilën e përmendi dhe në vizitën e tij zyrtare në Tiranë javën e kaluar.
Rama e mohoi një gjë të tillë, duke e paraprirë Starmer se kjo marrëveshje bëhet vetëm me Italinë dhe se Shqipëria nuk e ka kapacitetin për një kërkesë të tillë.