Mbretëria e Bashkuar pritet të përballet me një valë të re debatesh mbi migracionin, pasi Partia Reform UK ka propozuar një paketë masash të ashpra që do të prekin qindra mijëra migrantë.
Plani parashikon shfuqizimin e së drejtës për Leje të Pacaktuar Qëndrimi (ILR) pas pesë vitesh, duke e zëvendësuar me viza afatshkurtra. Migrantët do të detyrohen të riaplikojnë çdo pesë vjet, përballë kritereve më të rrepta për të ardhura dhe zotërimin e gjuhës angleze. Gjithashtu, përfitimet sociale do të kufizohen vetëm për qytetarët britanikë, ndërsa jo-qytetarëve do t’u ndalohet aksesimi i tyre. Përjashtim do të bëjnë shtetasit e BE-së të mbrojtur nga Marrëveshja e Tërheqjes pas Brexit.
Një tjetër masë e parashikuar është rritja e kohës së nevojshme për të marrë shtetësinë britanike, nga 6 në 7 vjet. Reforma pretendon se këto ndryshime do të kursejnë mbi 234 miliardë paund, por shifra është vënë në dyshim nga ekspertët dhe Zyra për Përgjegjësi Buxhetore.
Lideri Nigel Farage e ka cilësuar nismën si një përgjigje ndaj “valës së Borisit”, duke iu referuar rritjes së migracionit pas Brexit-it. Ndërkohë, Laburistët dhe Liberal Demokratët e kanë kritikuar planin duke e quajtur “jorealist dhe të dëmshëm për ekonominë dhe bizneset”.
Aktualisht, migrantët pas pesë vitesh qëndrimi në MB mund të aplikojnë për ILR, që u jep të drejtën të jetojnë, të punojnë dhe të përfitojnë nga sistemi i mirëqenies, duke hapur rrugën drejt shtetësisë. Plani i Reform UK synon ta ndryshojë këtë model rrënjësisht, duke ndezur një debat të ri politik ndërsa zgjedhjet afrohen.