Bandë shqiptarësh e vjedhjes kapet nga gjurmët e këpucëve Primark
Një bandë vjedhësish që vodhi më shumë se 1 milion paund pas sulmeve në dhjetëra shtëpi në Staffordshire dhe pjesë të tjera të Mbretërisë së Bashkuar u kap falë gjurmëve të këpucëve të tyre Primark. Pesë burra shqiptarë dhe një grua britanike u paraqitën në gjykatë për të pranuar rolet e tyre në këtë seri krimesh.
Gjatë vetëm gjashtë muajve, nga tetori 2024 deri në mars 2025, banda sulmoi 44 shtëpi, kryesisht të pasura dhe të vendosura larg qyteteve, duke vjedhur bizhuteri, çanta dizajni, orë dhe para. Ata përdornin një metodë të ngjashme pothuajse çdo herë, duke ngjitur shkallë për të hyrë nga dritaret e katit të parë dhe ballkonet.
Pasi hynin brenda, ata plaçkitnin shtëpitë, duke marrë sende me vlerë të lartë. Sipas policisë, në total u vodh më shumë se 1 milion paund, shumica e të cilave u shitën më pas.
Por banda u kap pasi hetuesit në Cheshire filluan të hetonin disa sulme në këtë qark, duke përfshirë Macclesfield dhe Prestbury. Përmes gjurmëve të këpucëve Primark të lëna në vendngjarje, hetuesit arritën të lidhin këto vjedhje me sulme të ngjashme në Staffordshire, Derbyshire dhe Nottinghamshire.
Teknologjia për njohjen automatike të targave të makinave gjithashtu identifikoi një Ford Focus të kuq, i siguruar nga një nga anëtarët e bandës, në vendngjarje gjatë shumë vjedhjeve, ndërsa një makinë e marrë me qira nga një tjetër anëtar u përdor gjithashtu në disa vjedhje të tjera. Kontrollimi i regjistrave të telefonave zbuloi se katër burra takoheshin rregullisht në një kafe në Jewellery Quarter të Birmingham. Më 2 korrik, hetuesit arrestuan tre burra dhe një grua pas sulmeve në shtëpi në Walsall, Sutton Coldfield dhe Birmingham. U sekuestruan gjithashtu 13 çanta dizajni dhe 14 orë me vlerë rreth 17,000 paund.
Dy burra të tjerë u arrestuan më vonë në Surrey dhe Sheffield. Gjatë kontrolleve u gjetën qindra foto në telefonat e tyre të sendeve të vjedhura, si dhe mesazhe me lidhje për Google Maps që përputheshin me vendngjarjet e vjedhjeve.
E.N 27 vjeç, K.G, 30 vjeç, G.LL, 31 vjeç, K.D, 28 vjeç, dhe S.LL, 26 vjeç, të gjithë pranuan fajësinë për komplot për kryerjen e vjedhjes dhe posedim të pasurisë kriminale gjatë seancave në Chester Crown Court më 28 nëntor të vitit të kaluar dhe sot (7 janar). Jade Tubb, 33 vjeç, pranoi fajësinë për posedim të pasurisë kriminale, ndërsa Nikolli dhe Lleshi pranuan edhe një akuzë shtesë për vjedhje.
Në total, banda u lidh me 44 vjedhje, duke përfshirë tetë në Cheshire, dy në Cleveland, nëntë në Derbyshire, dy në Leicestershire, pesë në Nottinghamshire, shtatë në Staffordshire, dy në Warwickshire dhe nëntë në West Mercia.