Arrestimet për punë të paligjshme në nivel rekord ndërsa qeveria rrit deportimet
Numri i arrestimeve për punë të paligjshme ka arritur nivele rekord, pasi policia ka shtuar kontrollet në biznese si sallone thonjsh, larje makinash, berberë dhe fast-food-e që dyshohen se punësojnë persona pa të drejtë pune në Mbretërinë e Bashkuar.
Gjatë vitit 2025 janë kryer 12,791 kontrolle, një rritje prej 57% krahasuar me vitin e kaluar (8,122).
Qeveria po synon të godasë punësimin e paligjshëm në kuadër të përpjekjeve për të dekurajuar ardhjet e paligjshme në vend.
Vitin e kaluar u regjistruan 8,971 arrestime, pothuajse 59% më shumë se në vitin 2024 (5,647) – shifra më e lartë e regjistruar ndonjëherë nga Home Office që prej 2019-s.
Nga të arrestuarit, 1,087 persona janë dëbuar nga Mbretëria e Bashkuar deri tani.
Ministrja e Brendshme, Shabana Mahmood, tha:
“Punësimi i paligjshëm nuk ka vend në komunitetet tona. Prandaj kemi rritur ndjeshëm kontrollet në nivelin më të lartë në historinë e Britanisë, që migrantët pa dokumente të mos kenë ku të fshihen. Nuk do të ndaloj derisa të rikthej rendin dhe kontrollin në kufijtë tanë.”
Sipas Home Office, kontrollet janë rritur me 77%, ndërsa arrestimet me 83% që kur ka ardhur në pushtet qeveria aktuale.
Nga korriku 2024 deri në dhjetor 2024 janë regjistruar 17,483 kontrolle dhe 12,322 arrestime, krahasuar me 9,894 kontrolle dhe 6,725 arrestime nga janari 2023 deri në qershor 2024.
Nga këto arrestime, 1,726 persona janë dëbuar, një rritje prej 35% krahasuar me periudhën 18-mujore të mëparshme.
Shembuj të rasteve të fundit:
- Më 25 nëntor, oficerët arrestuan 13 persona në një magazinë në Shoreham-by-Sea, West Sussex – 11 prej tyre shtetas brazilianë dhe rumunë u ndaluan për deportim.
- Më 16 dhjetor, 30 burra indianë dhe shqiptarë u arrestuan në një kantier ndërtimi në Swindon, Wiltshire. Shumica u ndaluan për deportim; pesë u lanë të lirë me kusht imigracioni.
Oficerët e imigracionit po përdorin gjithashtu kamera të vendosura në trup që nga shtatori për të ndihmuar në arrestime dhe ndjekje penale, si pjesë e financimit shtesë për të luftuar punën e paligjshme.
Ndërkohë, qeveria ka vendosur kontrolle më të rrepta për verifikimin e të drejtës për punë, sipas ligjit të ri të Sigurisë Kufitare, Azilit dhe Imigracionit. Tani edhe punëtorët e rastësishëm, të përkohshëm apo të nënkontraktuar duhet të vërtetojnë statusin e tyre.
Punëdhënësit që nuk kryejnë kontrollet e detyrueshme rrezikojnë deri në 5 vite burg, gjoba deri në £60,000 për çdo punëtor të paligjshëm dhe mbylljen e biznesit.