Policia ka gjetur një numër të madh “bimësh mjaft të pjekura” brenda një prone të listuar si trashëgimi kulturore e Gradës I në veri të Uellsit. Një kështjellë historike britanike, ku dikur ka qëndruar edhe Mbreti Charles III, në veri të Uellsit, ishte konvertuar në një fermë kanabisi.
Policia e Uellsit të Veriut gjeti një numër të madh bimësh brenda mureve prej guri të Plas Glynllifon, një pallat i shekullit të 19-të në veri të vendit, i cili më parë i përkiste Lord Newborough. Prona, e listuar si trashëgimi kulturore e Gradës I pranë Caernarfon në rajonin e Gwynedd, u mbyll nga oficerët pasi ata ekzekutuan një urdhër arresti të martën.
Brenda 12 dhomave të saj, në katin e sipërm u gjetën dhjetëra bimë, por nuk u krye asnjë arrestim në momentin e kontrollit. Një zëdhënës i policisë tha: “Ne zbuluam bimë të rritura në katin e sipërm të ndërtesës. Vlerësojmë se rreth 12 dhoma kishin bimë që rriteshin brenda. Ka shumë informacion për t’u përpunuar sot, si dhe shumë punë mjeko-ligjore për t’u marrë në konsideratë, si edhe materiale të tjera digjitale që po shqyrtojmë. Jam mjaft i bindur se mund të arrijmë në një pikë ku mund të bëjmë disa arrestime. Është e qartë se energjia elektrike po vidhej dhe furnizimi me ujë ishte manipuluar”, tha për BBC-në kapiteni Arwel Hughes nga Policia e Uellsit të Veriut.
Plas Glynllifon, që do të thotë “shtëpi mbretërore” në uellsisht, ka kopshte që shtrihen në 16 hektarë dhe ndodhet brenda territorit të Parc Glynllifon, i cili është i hapur për publikun.
Shtëpia neoklasike u ndërtua në vitet 1830 nga Lord Newborough, një figurë e shquar në Caernarfonshire, në tokat stërgjyshore të familjeve Glynne dhe Wynne, dhe ka më shumë se 100 dhoma, duke përfshirë një sallë vallëzimi, bibliotekë dhe gjashtë bodrume vere.
Godina ka një histori të pasur. Në vitin 1969, aty u mbajt balloja e investiturës së Princit të Uellsit, i cili sot është Mbreti Charles III. Në atë kohë, prona ishte në pronësi të këshillit të qarkut Caernarfonshire, i cili e kishte blerë nga një tregtar druri.