Britania e Madhe po hyn në një debat të ashpër mbi ndikimin e internetit dhe rrjeteve sociale tek fëmijët, ndërsa një pajisje e re e quajtur “Tin Can” po prezantohet si alternativa ndaj smartphone-ëve klasikë.
Telefoni, i krijuar fillimisht në SHBA dhe tashmë i hedhur në tregun britanik, është menduar për fëmijë të moshës 7 deri në 12 vjeç. Pajisja funksionon vetëm për telefonata përmes Wi-Fi dhe nuk ofron akses në TikTok, Instagram, Snapchat apo aplikacione të tjera sociale.
Sipas krijuesve të projektit, ideja lindi nga shqetësimi në rritje për varësinë e fëmijëve ndaj ekraneve dhe rrjeteve sociale. “Tin Can” lejon komunikim vetëm me kontakte të aprovuara nga prindërit dhe nuk ka kamera, lojëra apo mesazhe, duke rikthyer konceptin e telefonit tradicional familjar në një version modern.
Lançimi i pajisjes vjen në një moment kur qeveria britanike po shqyrton masa të forta për përdorimin e telefonave dhe mediave sociale nga të miturit. Londra ka nisur konsultime kombëtare për kufizime të mundshme ndaj platformave sociale për fëmijët nën 16 vjeç, përfshirë ndalimin e disa funksioneve që konsiderohen “varësuese”, si “infinite scroll” dhe njoftimet e vazhdueshme.
Në Britani po zhvillohen edhe prova pilot ku adoleshentëve u kufizohet përdorimi i rrjeteve sociale për disa javë, për të studiuar efektet në mirëqenie dhe sjellje.
Megjithatë, debati mbetet i ndarë. Organizata për sigurinë online paralajmërojnë se një ndalim total i rrjeteve sociale mund t’i shtyjë të rinjtë drejt hapësirave më pak të kontrolluara në internet.
“Tin Can” po shihet nga shumë prindër si kompromisi i ri: fëmijët komunikojnë me miqtë dhe familjen, por pa ekspozimin ndaj algoritmeve, videove të pafundme dhe presionit të rrjeteve sociale.