Një raport i Migration Advisory Committee (MAC) paralajmëron se emigrantët me paga të larta në Mbretërinë e Bashkuar janë më të prirur të largohen nga vendi dhe se politikat e reja të imigracionit mund ta përkeqësojnë këtë trend.
Sipas analizës së rreth 900,000 lëvizjeve migratore nga viti 2014 deri në 2025, personat që fitojnë mbi 125,000 £ në vit kanë më shumë gjasa të mos qëndrojnë gjatë në Britani, pasi kanë mundësi më të mira globale dhe më pak pengesa financiare për të lëvizur.
Raporti thotë se propozimet e qeverisë për të zgjatur nga 5 në 10 vjet periudhën për marrjen e qëndrimit të përhershëm mund të dekurajojnë edhe më shumë emigrantët e kualifikuar, përfshirë akademikët dhe profesionistët me të ardhura të larta.
Ndërkohë, emigrantët në sektorë si shëndetësia dhe kujdesi social tregojnë tendencë më të madhe për të qëndruar në vend, veçanërisht infermierët, ku rreth 94% mbeten pas 5 vitesh.
Qeveria thotë se synon të “përzgjedhë më mirë” emigrantët dhe të ulë varësinë nga punëtorët e huaj me paga të ulëta, por kritikët paralajmërojnë se kjo mund të dëmtojë ekonominë dhe sektorët që varen nga specialistët e huaj.