Sipas një raportimi të gazetës britanike The Guardian, Ministria e Brendshme e Britanisë (Home Office) ka dërguar letra zyrtare disa fëmijëve të vegjël, madje edhe 5-vjeçarë, duke u kërkuar të largohen nga Mbretëria e Bashkuar, pavarësisht se prindërit e tyre kanë të drejtë ligjore të qëndrojnë në vend.
Fëmijët janë pjesë e familjeve të punëtorëve të kujdesit social (care workers), të cilët kishin hyrë ligjërisht në Britani para ndryshimeve të rregullave të emigracionit. Në atë kohë, mbajtësit e vizës së punonjësit të kujdesit mund të sillnin bashkëshortët dhe fëmijët si persona në varësi (dependants).
Një nga rastet e publikuara është ai i një familjeje nga Sri Lanka që jeton në Skoci. Nëna punon si care worker dhe ka vizë të vlefshme deri në vitin 2031, por bashkëshorti dhe dy fëmijët e saj, 8 dhe 5 vjeç, kanë marrë letra ku u kërkohet të largohen nga Britania. Familja thotë se ka paguar mijëra paund për vizat, paguan taksa dhe nuk merr përfitime sociale.
Në letra, Home Office i informon familjet se fëmijët nuk kanë më të drejtë të qëndrojnë sipas statusit aktual të emigracionit. Një letër e ngjashme i është dërguar edhe një gruaje shtatzënë gjashtë muajshe, duke i kërkuar të largohet nga Britania edhe pse burri i saj vazhdon të ketë të drejtë qëndrimi.
Organizatat që mbrojnë emigrantët dhe sindikatat e sektorit të kujdesit e kanë kritikuar ashpër këtë praktikë, duke thënë se familjet po trajtohen padrejtësisht dhe se kjo mund të përkeqësojë mungesën e punonjësve në sektorin e kujdesit social, i cili varet shumë nga emigrantët.
Home Office ka deklaruar se e drejta për t’u vendosur përgjithmonë në Britani është një privilegj dhe se çdo rast vlerësohet sipas rregullave aktuale të emigracionit.
Ky lajm ka shkaktuar reagime të forta në Britani, sepse prek familje që kishin hyrë në vend në mënyrë të ligjshme dhe sipas rregullave që ishin në fuqi kur aplikuan për vizat e tyre.