Oxford Street, një nga rrugët tregtare më të frekuentuara të kryeqytetit britanik, pritet të monitorohet me kamera statike të pajisura me teknologjinë e njohjes së drejtpërdrejtë të fytyrës (Live Facial Recognition – LFR).
Sipas planeve të Policisë Metropolitane të Londrës, teknologjia do të përdoret në Oxford Street dhe në zona të tjera të West End-it, me synimin për të identifikuar persona të kërkuar nga policia dhe për të luftuar kriminalitetin në zonat me fluks të madh njerëzish.
Sistemi funksionon duke regjistruar fytyrat e personave që kalojnë përpara kamerave dhe duke i krahasuar ato në kohë reale me një listë personash që kërkohen nga autoritetet. Kur sistemi evidenton një përputhje të mundshme, policia mund të kryejë kontrolle të mëtejshme.
Teknologjia e njohjes së fytyrës është përdorur më parë nga Metropolitan Police në operacione të përkohshme në Oxford Street dhe Oxford Circus. Plani i ri, megjithatë, parashikon përdorimin e kamerave statike në zona të caktuara të West End-it.
Autoritetet argumentojnë se teknologjia mund të ndihmojë në kapjen e personave të kërkuar dhe në parandalimin e krimit. Nga ana tjetër, përdorimi i saj ka shkaktuar debate të forta rreth privatësisë dhe mbikëqyrjes së qytetarëve në hapësirat publike.
Organizatat për të drejtat civile kanë ngritur shqetësime lidhur me përpunimin e të dhënave biometrike, mundësinë e identifikimeve të gabuara dhe zgjerimin e mbikëqyrjes automatike në hapësirat publike.
Vendosja e kamerave në një zonë kaq të frekuentuar sa Oxford Street pritet ta rikthejë në qendër të debatit në Britani pyetjen se deri ku duhet të shkojë përdorimi i inteligjencës artificiale dhe njohjes së fytyrës në emër të sigurisë publike.