Një aksident i rëndë rrugor ka tronditur Britaninë e Madhe, ku shtatë persona kanë humbur jetën, mes tyre edhe dy efektivë policie.
Ngjarja tragjike ndodhi në orët e para të së shtunës, 22 gusht, në rrugën A66, në zonën South Bank pranë Middlesbrough, në verilindje të Anglisë.
Sipas të dhënave të bëra publike nga autoritetet britanike, përplasja ndodhi rreth orës 03:39 dhe përfshiu një Volkswagen Passat dhe një automjet të policisë së Cleveland.
Makina e dyshimtë po ndiqej nga policia
Hetimet paraprake tregojnë se Volkswagen Passat ishte konsideruar një automjet i dyshimtë dhe ishte përfshirë në një ndjekje policore.
Në rrethana që po hetohen, makina dyshohet se ka hyrë në sens të kundërt në A66, përpara se të përplasej kokë më kokë me automjetin e policisë që po udhëtonte në drejtimin e duhur.
Përplasja rezultoi fatale. Të shtatë personat që ndodheshin në dy automjetet u shpallën të vdekur në vendngjarje.
Identifikohen dy policët që humbën jetën
Dy efektivët e policisë që humbën jetën janë identifikuar si PC Matthew Blades, 37 vjeç, dhe PC Tom Clough, 38 vjeç, pjesëtarë të Cleveland Police.
Një detaj i rëndësishëm i dalë pas ngjarjes është se dy policët që humbën jetën nuk ishin efektivët që kishin nisur ndjekjen fillestare të Volkswagen-it.
Automjeti i tyre ndodhej në A66 kur makina që po lëvizte në drejtim të kundërt u përplas me të.
Pesë personat e tjerë që humbën jetën ndodheshin në Volkswagen Passat. Autoritetet po vijojnë procedurat për identifikimin zyrtar të tyre dhe njoftimin e familjarëve.
Hetim i pavarur për ndjekjen policore
Në vendngjarje u mobilizuan forca të shumta të emergjencës, ndërsa shërbimi i ambulancës dërgoi 14 njësi për t’iu përgjigjur incidentit.
Për shkak se tragjedia ndodhi pas një ndjekjeje policore, Independent Office for Police Conduct (IOPC) ka nisur një hetim të pavarur.
Hetuesit pritet të analizojnë të gjithë zinxhirin e ngjarjeve, që nga momenti kur policia konstatoi automjetin e dyshimtë, nisja e ndjekjes dhe hyrja e tij në sens të kundërt, deri te përplasja fatale me makinën ku ndodheshin dy policët.
Autoritetet britanike kanë bërë thirrje që të shmangen spekulimet mbi shkaqet dhe përgjegjësitë për tragjedinë, ndërsa hetimet për zbardhjen e plotë të ngjarjes vazhdojnë.