Pesë persona janë arrestuar në Angli, mes tyre tre shqiptarë, pasi një jaht që dyshohet se po transportonte emigrantë në mënyrë të paligjshme drejt Mbretërisë së Bashkuar u ndalua në brigjet jugore të vendit.
Sipas autoriteteve britanike, oficerët e Forcës Kufitare ndërhynë menjëherë pasi jahti mbërriti në marinën e Chichester, në West Sussex, mbrëmjen e së hënës, më 25 maj.
Në bord u gjetën shtatë persona, të gjithë shtetas shqiptarë, të cilët do t’u nënshtrohen procedurave nga autoritetet britanike të emigracionit.
Dy anëtarë të ekuipazhit, një britanik 42-vjeçar dhe një shqiptar 25-vjeçar, u arrestuan nën dyshimin për lehtësim të emigracionit të paligjshëm drejt Mbretërisë së Bashkuar.
Autoritetet identifikuan gjithashtu tre persona të tjerë, një britanik 38 vjeç dhe dy shqiptarë të moshave 24 dhe 32 vjeç, të cilët dyshohet se kishin shkuar në port për të pritur jahtin. Edhe ata u arrestuan për vepra të lidhura me trafikimin e emigrantëve.
Tre prej të arrestuarve janë liruar me kusht, në pritje të hetimeve të mëtejshme, ndërsa dy shtetasit shqiptarë, 25 dhe 32 vjeç, vijojnë të mbahen në paraburgim për shkelje të ligjeve të emigracionit.
Agjencia Kombëtare e Krimit në Britani po vijon hetimet për rastin, ndërsa autoritetet theksojnë se lufta kundër grupeve që organizojnë kalime të paligjshme drejt Mbretërisë së Bashkuar mbetet prioritet.