Një ngjarje e rëndë ka tronditur Britaninë e Madhe, ku një nënë dhe dy fëmijët e saj janë gjetur të pajetë brenda një banese në zonën Great Denham, pranë Bedford.
Sipas Policisë së Bedfordshire, oficerët hynë me forcë në banesë pasi familja nuk ishte parë prej disa ditësh. Brenda shtëpisë u gjetën trupat e pajetë të gruas dhe dy fëmijëve të saj, ndërsa menjëherë u hap një hetim për vrasje.
Autoritetet kanë bërë të ditur se kanë identifikuar një të dyshuar, i cili njihej me viktimat dhe besohet se është larguar nga Mbretëria e Bashkuar. Megjithatë, policia thekson se aktualisht nuk ka indicie për rrezik ndaj publikut.
Hetuesit vijojnë punën për zbardhjen e plotë të rrethanave të ngjarjes dhe u kanë bërë thirrje qytetarëve që mund të kenë informacion të dobishëm të bashkëpunojnë me autoritetet.
Identiteti i viktimave nuk është bërë ende publik, ndërsa motivi i mundshëm i krimit mbetet i paqartë. Hetimet janë ende në fazat e para.