Policia britanike ka identifikuar si Ervin Lita, 28 vjeç, i njohur gjithashtu si Ervin Axhami, shqiptarin që humbi jetën pasi u gjet në Compton Road, Leicester, në orët e para të mëngjesit të së dielës, 12 korrik.
Ervini u gjet në rrugë nga shërbimi i ambulancës dhe u shpall i vdekur në vendngjarje. Policia ka nisur një hetim për vrasje, ndërsa dy burra, 36 dhe 27 vjeç, janë arrestuar nën dyshimin për vrasje dhe më pas janë liruar me kusht ndërsa hetimet vazhdojnë.
Autoritetet po analizojnë kamerat e sigurisë, provat mjeko-ligjore dhe dëshmitë për të zbardhur rrethanat e plota të vdekjes së 28-vjeçarit. Deri tani, policia nuk ka bërë publik shkakun e saktë të vdekjes apo rrethanat që çuan në ngjarjen tragjike.