Alarm nga salmonela në Britani: mbi 200 të infektuar, një person humb jetën
Autoritetet shëndetësore në Britaninë e Madhe kanë ngritur alarmin pas një shpërthimi të salmonelës, i cili dyshohet se lidhet me vezë të importuara.
Deri më 13 gusht janë konfirmuar 207 raste të infektimit me Salmonella Enteritidis, ndërsa një person ka humbur jetën. Rastet janë regjistruar kryesisht në Angli, por të infektuar ka pasur edhe në Skoci, Uells dhe Irlandën e Veriut.
Hetimet e autoriteteve kanë treguar se një pjesë e rasteve mund të lidhen me konsumimin e vezëve të importuara, të përdorura veçanërisht në restorante dhe ambiente të tjera të shërbimit të ushqimit. Deri tani nuk është gjetur ndonjë lidhje me vezët apo shpendët e prodhuar në Britaninë e Madhe.
Autoritetet po vazhdojnë hetimet për të përcaktuar burimin e saktë të shpërthimit dhe kanë bërë thirrje për kujdes në përgatitjen dhe konsumimin e vezëve.
Salmonela mund të shkaktojë diarre, dhimbje barku, temperaturë, të përziera dhe të vjella. Në shumicën e rasteve simptomat kalojnë brenda disa ditësh, por infeksioni mund të jetë më serioz te të moshuarit, fëmijët e vegjël dhe personat me imunitet të dobësuar.