Një protestë kundër emigracionit shkaktoi kaos dhe ndërprerje të trafikut në Dover të Anglisë, pasi qindra protestues bllokuan rrugët që çojnë drejt një prej porteve më të rëndësishme të Britanisë së Madhe.
Shumë prej protestuesve ishin të veshur me të zeza dhe mbanin fytyrat të mbuluara. Ata u vendosën në rrugën A20, lidhën krahët dhe penguan lëvizjen e automjeteve drejt Portit të Doverit. Gjatë tubimit u dëgjuan thirrje si “Stop the boats” (“Ndaloni varkat”), një slogan që lidhet me kundërshtimin ndaj emigrantëve që kalojnë Kanalin e La Manshit me varka të vogla.
Bllokada shkaktoi radhë të gjata dhe vonesa për udhëtarët dhe transportin e mallrave. Pas disa orësh, protestuesit u larguan dhe qarkullimi drejt portit u rikthye. Sipas raportimeve, nuk pati arrestime.
Ngjarja ka sjellë edhe kritika ndaj policisë së Kentit. Politikanë lokalë dhe zyrtarë kanë kërkuar shpjegime se si një protestë me një numër të konsiderueshëm pjesëmarrësish arriti të organizohej dhe të bllokonte një arterie kaq të rëndësishme pa ndërhyrje të menjëhershme.
Policia e përshkroi fillimisht protestën si spontane, por janë ngritur pikëpyetje nëse aksioni ishte në fakt i organizuar paraprakisht. Raportimet tregojnë se disa protestues kishin ardhur nga zona të tjera dhe përdornin radio për t’u koordinuar.
Deputeti i zonës Dover and Deal, Mike Tapp, kërkoi sqarime nga autoritetet, duke ngritur shqetësime për numrin e kufizuar të efektivëve të policisë të pranishëm gjatë protestës.
Edhe qeveria britanike dënoi bllokimin e portit, duke theksuar se qytetarët kanë të drejtë të protestojnë në mënyrë paqësore, por jo të shkaktojnë pengesa serioze për udhëtarët dhe funksionimin e infrastrukturës kryesore të vendit.
Ngjarja vjen në një kohë kur emigracioni dhe kalimet e Kanalit të La Manshit vazhdojnë të jenë ndër çështjet më të debatueshme politike në Britaninë e Madhe, ndërsa presioni ndaj autoriteteve për kontrollin e kufijve mbetet i lartë.