Presidenti amerikan, Donald Trump, ka sulmuar publikisht kryeministrin britanik Keir Starmer, duke e cilësuar si “jo të dobishëm” në lidhje me qëndrimin e Mbretërisë së Bashkuar ndaj sulmeve të SHBA-së kundër Iranit.
Në një intervistë për gazetën britanike The Sun, Trump u shpreh i zhgënjyer nga pozicioni i Londrës zyrtare, duke lënë të kuptohet se marrëdhëniet mes dy vendeve nuk janë më në nivelin që kanë qenë më parë.
“Nuk ka qenë i dobishëm. Nuk mendova kurrë se do ta shihja këtë nga ai. Nuk mendova kurrë se do ta shihja këtë nga Mbretëria e Bashkuar,” deklaroi Trump. Ai shtoi se është “shumë e trishtueshme të shohësh që marrëdhënia padyshim nuk është ajo që ishte”.
Nga ana tjetër, një ditë më parë, kryeministri britanik Keir Starmer deklaroi se qeveria britanike “nuk beson në ndryshimin e regjimit nga qielli”, duke sinjalizuar një distancim nga një përshkallëzim i mëtejshëm ushtarak kundër Iranit.
Deklaratat e fundit tregojnë për një tension të mundshëm diplomatik mes Uashingtonit dhe Londrës lidhur me qasjen ndaj situatës në Lindjen e Mesme dhe politikës ndaj Iranit.