Blerësit e shtëpisë së parë në Angli pritet të përfitojnë nga një skemë e re që synon ta bëjë më të lehtë hyrjen në tregun e pronave, duke mundësuar blerjen e një banese të re me një depozitë prej vetëm 2.5%.
Skema e quajtur “Your First Home” synon të ndihmojë personat që kanë mundësi të përballojnë pagesat mujore të një hipoteke, por e kanë të vështirë të kursejnë shumën e madhe që kërkohet zakonisht si depozitë.
Sipas planit, mbështetja mund të përfshijë një equity loan deri në 20% të vlerës së pronës, ndërsa blerësi do të duhet të sigurojë një depozitë minimale prej vetëm 2.5%.
Për shembull, për një pronë me vlerë £230,000, një depozitë prej 2.5% do të ishte £5,750.
Skema pritet të fokusohet te shtëpitë e reja (new-build), ndërsa do të vendosen edhe kritere lidhur me të ardhurat e familjes dhe vlerën maksimale të pronës.
Detajet përfundimtare, përfshirë kriteret e aplikimit dhe mënyrën se si do të funksionojë mbështetja financiare, pritet të bëhen të ditura më tej.
Nisma synon t’u japë më shumë mundësi të rinjve dhe familjeve që duan të hedhin hapin e parë drejt pronësisë së një shtëpie, në një kohë kur çmimet e pronave dhe depozitat e larta vazhdojnë të jenë pengesë për shumë blerës të rinj.