Nigel Farage ka shkaktuar reagime të forta në Mbretërinë e Bashkuar pasi kërkoi ndalimin e lutjeve masive myslimane në hapësira publike dhe vende historike.
Deklarata e tij erdhi pas një eventi të madh të Ramazanit në Trafalgar Square në Londër, ku qindra besimtarë myslimanë u mblodhën për lutje dhe iftar.
Farage tha se ngjarje të tilla nuk janë thjesht praktikë fetare, por “një përpjekje për të dominuar dhe intimiduar mënyrën tonë të jetesës”, duke shtuar se nëse do të ishte në pushtet, do të ndalonte lutje të tilla masive në vende historike britanike.
Ai theksoi se nuk është kundër lutjeve individuale, por kundër tubimeve të mëdha fetare në publik, të cilat i konsideron “provokuese”.
Deklaratat e tij vijnë në një moment kur debati për lirinë fetare dhe përdorimin e hapësirave publike është intensifikuar në politikën britanike. Kryeministri Keir Starmer reagoi duke theksuar se në Britani zhvillohen aktivitete fetare të ndryshme, duke përfshirë ato të krishtera, hebraike dhe hindu, si pjesë e diversitetit të vendit.
Ndërkohë, kritikët e Farage e kanë cilësuar qëndrimin e tij si përçarës dhe diskriminues, duke paralajmëruar se mund të nxisë tensione ndaj komunitetit mysliman në vend.
Debati pritet të vazhdojë, ndërsa çështja e fesë dhe hapësirës publike mbetet një nga temat më të nxehta në politikën britanike aktuale