Qeveria britanike po përgatit ndryshime të rëndësishme në sistemin e emigracionit, të cilat mund të prekin mijëra emigrantë që jetojnë dhe punojnë në Mbretërinë e Bashkuar.
Sipas propozimeve të reja, rruga drejt qëndrimit të përhershëm, i njohur si Indefinite Leave to Remain (ILR), mund të zgjatet ndjeshëm për disa kategori emigrantësh. Aktualisht, shumë persona mund të aplikojnë për qëndrim të përhershëm pas pesë vitesh qëndrimi të ligjshëm në Britani, por ndryshimet e propozuara mund ta çojnë këtë periudhë në 10 vjet, ndërsa në raste të caktuara deri në 20 vjet.
Autoritetet britanike e kanë lidhur reformën me synimin për të krijuar një sistem të ashtuquajtur “qëndrim i fituar”, ku e drejta për vendosje të përhershme do të varet nga faktorë si puna, të ardhurat, njohja e gjuhës angleze, respektimi i ligjeve dhe kontributi në shoqëri.
Masat kanë shkaktuar shqetësim mes komuniteteve të emigrantëve, pasi shumë familje mund të përballen me pasiguri më të gjatë për të ardhmen e tyre në Britani. Organizata të ndryshme paralajmërojnë se zgjatja e periudhës së pritjes mund të rrisë kostot financiare për aplikantët dhe të vështirësojë integrimin e tyre.
Megjithatë, një pjesë e ndryshimeve janë ende në fazë propozimi dhe konsultimi. Rregullat përfundimtare pritet të sqarojnë se cilat kategori do të preken, kur do të hyjnë në fuqi dhe nëse do të ketë përjashtime për personat që tashmë ndodhen në rrugën drejt qëndrimit të përhershëm.
Ekspertët këshillojnë emigrantët të ndjekin me kujdes njoftimet zyrtare dhe të mos bazohen vetëm në informacione të pakonfirmuara, pasi ndryshimet mund të ndikojnë ndryshe në varësi të llojit të vizës dhe historikut personal të qëndrimit në Britani.