Partia Konservatore në Britaninë e Madhe ka paraqitur një plan të ri për reformimin e sistemit të përfitimeve sociale, sipas të cilit disa persona të papunë që marrin Universal Credit mund të përballen me ulje prej rreth 30% të pagesës standarde.
Sipas propozimit, personat që konsiderohen të aftë për punë do të vazhdonin të merrnin shumën e plotë të Universal Credit gjatë gjashtë muajve të parë të papunësisë.
Pas kësaj periudhe, vazhdimi i pagesës së plotë do të varej edhe nga historiku i punës dhe kontributeve të personit në sistem.
Personat që nuk kanë kontribuar mjaftueshëm do të kalonin në një pagesë të re të quajtur “Subsistence Allowance”, e cila do të ishte në nivelin 70% të pagesës standarde të Universal Credit.
Sipas planit, çdo dy vite të kaluara në punë do t’i jepnin një personi të drejtën për një vit shtesë me pagesën e plotë të Universal Credit.
Për shembull, një person që ka dy vite kontribute të mëparshme do të mund të merrte edhe një vit shtesë të pagesës së plotë, përpara se të kalonte në nivelin e reduktuar nëse vazhdon të jetë i papunë.
Pagesat e reduktuara do të kalonin në një kartë të posaçme
Një tjetër pjesë e planit është krijimi i një karte të parapaguar të quajtur “Back to Work Card”.
Personat që kalojnë në nivelin e reduktuar të Universal Credit do ta merrnin pagesën përmes kësaj karte.
Karta do të mund të përdorej për ushqime, faturat dhe nevoja të tjera të përditshme, por do të vendoseshin kufizime për blerjen e alkoolit dhe cigareve, përdorimin e parave për baste ose lojëra fati, si dhe për tërheqjen e parave cash.
Kush nuk do të prekej?
Sipas propozimit të publikuar, masat nuk do të zbatoheshin ndaj të gjithë përfituesve të Universal Credit.
Personat që tashmë punojnë dhe marrin Universal Credit do të përjashtoheshin.
Gjithashtu, të përjashtuar do të ishin personat e sëmurë ose me aftësi të kufizuara që janë vlerësuar se nuk kanë kapacitet për punë dhe aktivitete të lidhura me punësimin.
Elementet e Universal Credit që lidhen me strehimin/qiranë dhe fëmijët në varësi gjithashtu nuk do të reduktoheshin nga kjo masë.
Rreth 350 mijë persona mund të preken
Partia Konservatore vlerëson se rreth 350,000 përfitues në Angli, Skoci dhe Uells mund të kalonin në nivelin e reduktuar të pagesës.
Sipas llogaritjeve të partisë, ndryshimet do t’i kursenin financave publike rreth 538 milionë paund në vit.
Liderja konservatore Kemi Badenoch e ka argumentuar planin me qëndrimin se sistemi i mirëqenies sociale duhet të funksionojë si një rrjet sigurie për personat që kanë realisht nevojë për ndihmë dhe se personat që janë në gjendje të punojnë duhet të nxiten drejt punësimit.
Organizatat kundër varfërisë kritikojnë planin
Propozimi ka shkaktuar gjithashtu kundërshtime.
Organizata kundër varfërisë Trussell ka paralajmëruar se reduktimi i të ardhurave të personave që tashmë kanë vështirësi për të përballuar ushqimin, qiranë dhe transportin mund ta bëjë edhe më të vështirë gjetjen dhe mbajtjen e një pune.
Edhe Child Poverty Action Group ka paralajmëruar se masa të tilla mund të shtojnë varfërinë në një periudhë kur familjet vazhdojnë të përballen me kosto të larta jetese.
Ndërkohë, Partia Laburiste e ka cilësuar skemën e propozuar si të pazbatueshme.
E rëndësishme: Masat e mësipërme janë aktualisht propozime politike të Partisë Konservatore dhe nuk përbëjnë ndryshime të Universal Credit që kanë hyrë në fuqi. Përfituesit nuk duhet ta interpretojnë njoftimin si një ulje automatike të pagesave të tyre aktuale.