Presidenti i Shteteve të Bashkuara, Donald Trump, ka firmosur një urdhër ekzekutiv që parashikon uljen e tarifave mbi makinat e importuara nga Mbretëria e Bashkuar , si pjesë e zbatimit të një marrëveshjeje tarifore të arritur muajin e kaluar mes dy vendeve.
Lajmi u bë publik gjatë pjesëmarrjes së Trump në samitin e G7 në Kanada. Kryeministri britanik, Sir Keir Starmer, e cilësoi vendimin si një “ditë shumë të rëndësishme” për marrëdhëniet tregtare ndërmjet SHBA-së dhe Mbretërisë së Bashkuar.
Marrëveshja vjen pas javësh negociatash dhe, sipas qeverisë britanike, ka për qëllim mbrojtjen e bizneseve britanike nga ndikimi negativ i tarifave të mëparshme të vendosura nga administrata amerikane. Megjithatë, marrëveshja nuk parashikon heqjen e plotë të tarifave. Një tarifë prej 10% do të vazhdojë të aplikohet për shumicën e mallrave britanike, përfshirë automjetet. Po ashtu, nuk përfshihen masa për eliminimin e tarifave mbi çelikun e importuar, çështje që mbetet veçanërisht e ndjeshme për industrinë britanike. Ky është pakti i parë tregtar i bërë publik nga Shtëpia e Bardhë që prej vendosjes së një vale të re tarifash ndaj produkteve të huaja në fillim të këtij viti.
Firmosja e urdhrit ekzekutiv u krye pak përpara se të njoftohej se Presidenti Trump do të largohej përpara kohe nga samiti i G7, për shkak të zhvillimeve të fundit në Lindjen e Mesme.