Presidenti francez Emmanuel Macron do të udhëtojë këtë javë me një karrocë kuajsh drejt Kështjellës së Windsorit, në një vizitë shtetërore që simbolizon rikthimin e marrëdhënieve të ngushta mes Parisit dhe Londrës, duke vënë kështu një vijë të re mbi përplasjet e ashpra të viteve të Brexit-it.
Pallati Elysee theksoi se “interesat e përbashkëta” janë në qendër të marrëdhënies franko-britanike, duke e përshkruar si një aleancë “të domosdoshme” në skenën ndërkombëtare. Edhe pala britanike e cilësoi këtë rilidhje si “jetike”, sidomos në një kohë kur rendi global po përballet me sfida të mëdha, nga Ukraina në Lindjen e Mesme. Kjo është vizita e parë shtetërore e një lideri evropian në Mbretërinë e Bashkuar pas Brexit, një detaj që në Paris e shohin si sinjal të marrëdhënieve të veçanta që po rilindin.
Franca dhe Britania vazhduan bashkëpunimin në fushën e sigurisë dhe mbrojtjes edhe pas Brexit, por pritet që këto marrëdhënie të thellohen më tej në samitin franko-britanik që zhvillohet këtë javë në Downing Street, ku të dy vendet udhëheqin të ashtuquajturën “koalicioni i vullnetit” për Ukrainën. Vizita e Macron-it vjen gjithashtu në një moment kur kryeministri britanik Keir Starmer po përpiqet të mbyllë kapitullin “e acarimit” me Francën që karakterizoi epokën e Boris Johnson-it dhe Liz Truss-it, të cilët shpesh ushqyen retorikë anti-franceze. Ndërkaq, marrëdhëniet nisën të përmirësohen me ardhjen e Rishi Sunak dhe u forcuan nga vizita shtetërore e Mbretit Charles në Francë vitin e kaluar.
Sot, Macron dhe Starmer takohen shpesh dhe kanë krijuar një bashkëpunim të fortë, veçanërisht për çështjen e Ukrainës. Ekspertët e politikës ndërkombëtare theksojnë se në një kohë kur rendi global po lëkundet, është jetike që dy vende me peshë në OKB, fuqi bërthamore dhe ndikim të madh diplomatik të qëndrojnë të bashkuara.
Por, mbetet një plagë ende e hapur: numri në rritje i emigrantëve që përpiqen të kalojnë Kanalin me gomone, me pasoja tragjike. Vetëm këtë vit, gati 20 mijë persona kanë mbërritur në brigjet britanike nga Franca, ndërsa 17 kanë humbur jetën. Qeveritë pritet të diskutojnë masa të reja për këtë krizë në samitin e kësaj jave.
Sipas analistëve, edhe pse Macron dhe Starmer përballen me presione të brendshme nga e djathta ekstreme, përmirësimi i marrëdhënieve është një sinjal për stabilitet dhe vullnet për bashkëpunim në kohë turbulencash globale.