– Kryeministri i Republikës së Shqipërisë, z. Edi Rama, u prit sot në një ceremoni zyrtare nga Madhëria e Tij, Mbreti Charles III i Mbretërisë së Bashkuar, në Pallatin e Shën Jakobit (St James’s Palace) në Londër.
Takimi u zhvillua në kuadër të Samitit të Procesit të Berlinit për Ballkanin Perëndimor, i cili këtë vit mbahet në Mbretërinë e Bashkuar.
Në këtë pritje morën pjesë udhëheqësit e vendeve të Ballkanit Perëndimor: Shqipërisë, Bosnjë-Hercegovinës, Kosovës, Malit të Zi, Maqedonisë së Veriut dhe Serbisë.
Të pranishëm ishin gjithashtu Kryeministri britanik Keir Starmer dhe përfaqësues të lartë të diplomacisë britanike e europiane.
Në fjalën e tij përshëndetëse, Mbreti Charles III nënvizoi rëndësinë e bashkëpunimit të vendeve të Ballkanit Perëndimor me Mbretërinë e Bashkuar dhe Bashkimin Europian, duke theksuar se stabiliteti dhe zhvillimi ekonomik i rajonit janë kyç për paqen dhe sigurinë e kontinentit.
Kryeministri Edi Rama shprehu mirënjohjen për mikpritjen dhe theksoi vlerën që mbart mbështetja britanike për proceset integruese dhe zhvillimore të Ballkanit Perëndimor.
“Shqipëria dhe rajoni ynë kanë bërë hapa të rëndësishëm drejt forcimit të institucioneve demokratike dhe bashkëpunimit rajonal. Mbretëria e Bashkuar ka qenë gjithmonë një partnere e besueshme në këtë rrugëtim,” – deklaroi Kryeministri Rama.
Takimi në Pallatin e Shën Jakobit parapriu punimet e samitit të Berlinit, ku do të diskutohen çështje kyçe si bashkëpunimi ekonomik, siguria, migracioni dhe rruga drejt integrimit europian.