Pas kritikave të kryeministrit ndaj Home Office, migrantët do të zhvendosen nga hotelet në dy baza ushtarake deri në fund të nëntorit
Qeveria britanike ka njoftuar se rreth 900 burra azilkërkues do të zhvendosen në dy baza ushtarake – në Cameron Barracks në Inverness dhe Crowborough Training Camp në East Sussex – si pjesë e planit për të ndaluar përdorimin e hoteleve për akomodimin e përkohshëm të azilkërkuesve.
Zhvendosja pritet të fillojë deri në fund të muajit nëntor, kanë konfirmuar burime nga Home Office.
Vendimi vjen pas kritikave të drejtpërdrejta të kryeministrit ndaj Ministrisë së Brendshme, lidhur me koston e lartë dhe mungesën e efikasitetit në menaxhimin e sistemit të azilit. Aktualisht, mijëra azilkërkues janë strehuar në hotele në të gjithë Britaninë, një praktikë që sipas raporteve parlamentare i ka kushtuar shtetit miliona paund çdo muaj.
Një raport i fundit i deputetëve britanikë theksonte se Home Office ka “dështuar në menaxhimin e kontratave dhe në kontrollin e shpenzimeve”, duke çuar në tre herë rritje të kostove për periudhën 2019–2029.
Në reagimin e saj, Ministria e Brendshme tha se përdorimi i objekteve ushtarake do të ofrojë një zgjidhje më “të qëndrueshme dhe më të përballueshme ekonomikisht”, duke theksuar se qeveria është e përkushtuar të ulë varësinë nga hotelet.
“Qeveria është e përkushtuar të sigurojë kushte të përshtatshme strehimi për azilkërkuesit, duke reduktuar njëkohësisht kostot për taksapaguesit,” – thuhet në deklaratën e Home Office.
Të dy bazat e përzgjedhura kanë qenë më parë në përdorim për strehimin e familjeve afgane të evakuuara pas rënies së Kabulit në vitin 2021, çka sipas autoriteteve, tregon se objektet mund të përshtaten shpejt për përdorim humanitar.
Megjithatë, organizatat për të drejtat e njeriut kanë paralajmëruar për rreziqe në kushtet e jetesës dhe mungesën e mbështetjes psikosociale në ambientet ushtarake, duke u bërë thirrje autoriteteve të sigurojnë që standardet humane të respektohen plotësisht.
Ndërkohë, kryeministri britanik ka kërkuar nga Ministria e Brendshme dhe ajo e Mbrojtjes që të përshpejtojnë procesin e identifikimit të vendeve të tjera të përshtatshme ushtarake për strehimin e përkohshëm të azilkërkuesve, me rezultate që pritet të publikohen në javët në vijim.