Një incident tronditës ka ngritur shqetësime serioze mbi përdorimin e dronëve nga policia në Mbretërinë e Bashkuar. Një fëmijë mbeti i plagosur rëndë dhe u dërgua me urgjencë në spital pasi u godit nga një dron policie që u rrëzua gjatë një operacioni në Isle of Sheppey, në Kent.
Sipas hetimeve paraprake, droni ishte lëshuar nga Kent Police për të kërkuar një të dyshuar pas raportimeve për një sulm. Pajisja, një model DJI M30T me peshë rreth 4 kilogramë dhe e pajisur me kamera termike, kamerë të gjerë dhe zmadhim, u përplas me një kabllo ajrore që oficeri nuk e kishte vënë re gjatë lëshimit të shpejtë.
Përplasja bëri që droni të binte në tokë dhe të godiste fëmijën, duke i shkaktuar një dëmtim serioz në dorë. Mosha e saktë e të miturit dhe gjendja e tij shëndetësore nuk janë bërë publike.
Rasti u shqyrtua nga Air Accident Investigation Branch, e cila vendosi të zhvillojë vetëm një hetim të tipit record only, duke argumentuar se një hetim i plotë nuk pritej të sillte gjetje të reja për sigurinë ajrore. Sipas raportit, rreziku i kabllos ajrore nuk ishte identifikuar gjatë vendosjes së menjëhershme të dronit.
Ndërkohë, Independent Office for Police Conductka nisur një hetim të pavarur, duke e shënuar këtë si rastin e parë në Britani ku një civil plagoset nga një dron policie. Një inspektor i posaçëm është pajisur me njoftim për sjellje të pahijshme, megjithëse kjo nuk do të thotë domosdoshmërisht se do të pasojnë masa disiplinore.
Policia e Kentit ka deklaruar se nuk mund të komentojë më tej për shkak të hetimit në vazhdim. Ngjarja ka hapur një debat të gjerë mbi sigurinë, procedurat dhe rreziqet e përdorimit të teknologjisë ajrore në operacionet policore, veçanërisht në zona të banuara dhe pranë civilëve.