Një person ka humbur jetën dhe afro 100 të tjerë janë plagosur pas një aksidenti të rëndë hekurudhor që ndodhi të premten pasdite mes Lutonit dhe Bedfordit, në veri të Londrës. Dy trena pasagjerësh të kompanisë East Midlands Railway u përplasën në të njëjtën linjë pranë Elstow, në jug të Bedfordit.
Sipas shërbimeve të emergjencës, 11 persona kanë pësuar lëndime shumë serioze, 22 të tjerë janë plagosur rëndë, ndërsa dhjetëra pasagjerë morën ndihmë mjekësore në vendngjarje ose u dërguan në spitale. Autoritetet kanë konfirmuar një viktimë, e cila besohet të jetë drejtuesi i njërit prej trenave.
Dëshmitarët treguan se dëgjuan një zhurmë të fortë përpara se pasagjerët të hidheshin nga vendet e tyre, ndërsa në vendngjarje mbërritën mbi 20 ambulanca, ekipe zjarrfikëse dhe disa helikopterë mjekësorë. Incidenti u shpall emergjencë madhore.
Hetuesit po punojnë për të përcaktuar shkakun e aksidentit. Raportet paraprake sugjerojnë se njëri tren ishte ndalur për shkak të një problemi teknik, ndërsa treni tjetër u përplas nga pas.
Përplasja ka shkaktuar ndërprerje të mëdha në trafikun hekurudhor ndërmjet Bedfordit, Lutonit dhe Londrës, ndërsa shumë shërbime trenash janë pezulluar.