Një aksident i rëndë zinxhir ka ndodhur në autostradën M20, pranë Maidstone, në juglindje të Anglisë, ku mbi 30 automjete janë përfshirë në një përplasje masive si pasojë e mjegullës së dendur dhe dukshmërisë jashtëzakonisht të ulët.
Ngjarja ka ndodhur mbrëmjen e së shtunës, më 7 nëntor, rreth orës 18:41, në segmentin e autostradës ndërmjet daljeve 8 dhe 9, duke shkaktuar kaos në qarkullim dhe mobilizimin e menjëhershëm të policisë, ambulancave dhe shërbimeve të emergjencës.
Sipas raportimeve të mediave britanike, 11 persona kanë marrë ndihmë mjekësore pas aksidentit, ndërsa dy prej tyre kanë pësuar lëndime serioze.
Autoritetet britanike kanë bërë të ditur se lëndimet e dy personave në gjendje më të rëndë nuk konsiderohen kërcënuese për jetën. Fatmirësisht, nga kjo përplasje masive nuk janë raportuar viktima.
Mjegulla e dendur, e cila kishte përfshirë disa zona të Anglisë, dyshohet të ketë qenë një faktor kryesor në aksident, pasi dukshmëria e kufizuar ka vështirësuar reagimin në kohë të drejtuesve të automjeteve. Megjithatë, rrethanat e sakta të përplasjes mbeten çështje e hetimeve të autoriteteve.
Pas aksidentit, segmenti i prekur i autostradës M20 u mbyll për disa orë, ndërsa ekipet e emergjencës punuan për t’u ardhur në ndihmë të lënduarve dhe për të larguar automjetet e dëmtuara. Qarkullimi u rikthye në orët e para të mëngjesit të së dielës, më 8 nëntor.
Ndërkohë, autoritetet meteorologjike britanike kanë paralajmëruar për vazhdimin e kushteve të vështira atmosferike, me mjegull të dendur në disa rajone, ku dukshmëria mund të zbresë deri në 50 metra.
Drejtuesve të automjeteve u bëhet thirrje të tregojnë kujdes të shtuar, të reduktojnë shpejtësinë dhe të ruajnë distancën e sigurisë gjatë udhëtimit.